翔德轉場收復失地

不死鸟

苗禮德近期手風順到不得了，剛戰又憑「多多昇」贏馬，季內已經勝出7場頭馬，表現相當不錯。今次沙田全泥宴夜賽，這位旺人練馬師出馬5匹，而全部戰馬更由鄉里卓利上陣，似乎這對南非組合明晚拍住上一定有計，值得留意。列陣第一場的「翔德」，今次轉戰泥地1200米，相信已是交代之時，絕對有能力為苗禮德先拔頭籌。
此駒近兩仗閘前賠率都有異動，前仗跑1600米閘前由10倍急跌到7倍，不過馬匹起步騎師便墮馬，落飛客真金白銀當然付諸流水。上場此駒改戰田草1200米，臨場再度落飛，由12倍跌至9.6倍，最終因在直路初段一度被困，以致姍姍來遲只能取得季軍，再一次令捧場客失望。
今次此駒轉往跑泥地1200米，似乎風馬牛不相及，不過在上場之前，牠曾試過一課1200米泥閘，走勢良好，因此深信此駒跑泥地賽一定無問題。雖然今次馬匹排在不利的10檔起步，但以其跑法後上湧一段，對發揮料影響不大。
若然捧場客近兩仗都有跟風，今次一定要跟多一次，隨時有望本利歸還。