巴塞食包冇黐牙

猪拉多纳

MSN再合體衝三冠次關

今晚西班牙盃爆發終極王者之戰，由巴塞隆拿坐鎮魯營球場火併畢爾包爭冠。巴塞前鋒蘇亞雷斯好番趕及復出，與美斯及尼馬嘅「MSN」再合體令火力大增，已於聯賽封王嘅「地上最強」欲成就三冠大業，美斯豪言第二關嘅西班牙盃志在必得，咁蹺上次榮登三冠王之路，巴塞正正係踩住畢爾包奪西盃，「巴斯克雄獅」質遜難阻人發達，就算讓球主客和要讓兩球，斯維照撐巴塞讓球主勝。

（now 632周日凌晨3時30分直播）

先講一些題外話，原定今屆西盃決賽於皇馬嘅巴拿貝球場舉行，不過有傳當時已出局嘅皇馬，唔想死對頭巴塞喺自己地頭捧盃，便以冇檔期為由拒絕，經過投票後，最終選定於巴塞嘅魯營球場上演，「地上最強」幸運地先贏地利。至於弗爆射手蘇亞雷斯，自歐聯4強次回合對拜仁拉傷左腳大腿筋後，錯過最尾兩場聯賽令人擔心，好彩「蘇神」及時傷愈，軍醫亦為佢上陣開綠燈，現時巴塞冇晒傷兵，以最佳人腳迎接今仗同嚟緊嘅歐聯決賽。
畢爾包殘陣難抵擋

最開心梗係拍檔美斯喇，賽前呢位巴塞王牌喺facebook上載咗張自己施展倒掛金鈎嘅訓練相，仲留言話:「下一步，西班牙盃！」簡單而不失霸氣。的確，巴塞今季單靠佢哋同尼馬組成嘅「MSN」鋒線，喺各項賽事轟入117球，今仗蘇亞雷斯傷愈復出，火力大增，難怪美斯信心爆棚。畢爾包中場蒙尼恩、伊拜高美斯及後衞伊拉奧拿因傷避戰，實力受削，點擋得住重新合體嘅「MSN」呀？而且聯賽排第七嘅畢軍，無論今仗輸定贏，都已穩袋下屆歐霸入場券，戰意不及對手。

巴塞名宿兼少帥安歷基今季首次帶領「地上最強」，已先奪聯賽錦標，當然想擸埋西盃同歐聯，成就三冠王大業，猶記得2008至09年度球季，巴塞同樣由首次領軍嘅少帥哥迪奧拿帶隊下，曾榮登三冠王寶座，咁蹺當時喺西盃決賽，佢哋以4比1大勝畢爾包。依家「地上最強」同當年情況非常相似，預計可大勝「巴斯克雄獅」，為下周歐聯決賽對祖雲達斯造勢，就算讓球主客和要讓兩球都冇有怕，力撐巴塞讓球主勝。