阿爾巴尼亞下盤encore

猪拉多纳

肥叔唔只一次喺呢度講大戶今年有幾黑仔，上周歐聯決賽祖記對巴塞，大批散戶全面唱好「地上最強」，臨場由半一變到要讓一球，大戶可能輸得太多，初段冇乜動作，等到巴塞於下半場中段領先2比1嗰陣仲要讓平半，大戶終於按捺不住入咗幾百粒祖記下盤。的確當時「斑馬兵團」大舉反撲，巴塞被迫全軍退守，眼看守得住個下盤之際，卻喺補時最後一刻畀尼馬篤爆，大戶真係無語問蒼天。
法國防線靠唔住

言歸正傳，今日國際賽做主打，歐國盃外圍賽、美洲盃甚至世青盃戰雲密布，不過肥叔反而對熱身賽法國作客阿爾巴尼亞情有獨鍾，由於法國係2016年歐國盃主辦國直入決賽周，因此只能藉住毫無競爭性嘅「拍跳」試陣，日前佢哋先以3比4輸畀比利時，嗰條防線咁牙煙實在靠唔住，阿爾巴尼亞上年曾作客賽和法國表現唔曳，今仗有埋地利兼受讓一球，呢個下盤不容錯過。

（有線62及202台周日凌晨零時直播）