哥連泰斯唔齊腳捱細界

猪拉多纳

美洲國家盃舉行期間，巴甲照踢，部分球隊有國腳被徵召難免受影響。哥連泰斯中場指揮官伊利亞斯文迪斯入選咗巴西隊，加上射手荷西古里路已離隊，攻力大為削弱，今輪主場對國際體育會，想入波相當困難。不過國體會亦有射手利辛度盧比斯同中場路爾斯安達臣停賽，相信惡唔出樣，阿King捧入球細。

（周日凌晨3時30分開賽）

哥連泰斯本身攻力麻麻，近九場比賽只入四球，上季首席射手荷西古里路仲喺五月尾同會方解約，令情況雪上加霜，依家缺乏正宗射手可用。中場大腦伊利亞斯文迪斯被巴西國家隊徵召，出戰美洲國家盃，頓失進攻重心之下，想搶攻亦有心無力。國際體育會有後衞謝菲臣泰利斯入選巴西隊，但最大問題係前鋒利辛度盧比斯同中場路爾斯安達臣坐波監，入波本錢受削。同埋國體會近六場作客未贏過，恐怕咬唔入哥連泰斯。
查比高恩斯主場夠惡

另一場巴甲，升班球隊查比高恩斯今季表現令人驚喜，近五次主場出擊全勝，有力爆冷擊敗聖保羅。美職方面，紐約城即使有西班牙球星韋拿助陣，但表現冇料到，今季十四場聯賽僅兩勝，主場對近五仗四勝嘅蒙特利爾衝擊，寧捧客軍。