麥露蓮撐老公放封塵閃光彈

猪拉多纳

英格蘭隊長朗尼力爭做「三獅士哥王」，難得老公咁有大志，老婆麥露蓮立即隔空打氣，上周五喺社交網站上載一張7年前佢哋結婚嗰陣嘅親密咀嘴相，放晒閃光彈堅「燦眼」，慶祝兩人結婚7周年紀念，張相係就係舊咗啲，但大晒恩愛確實Sweet到爆，「魔童」近年確實修心養性，冇再出去搞三搞四專心踢波，老婆麥露蓮功不可沒，依家又隔空為老公加油，相信朗尼會更有動力。
禾仔擔正賀繼續做「兵」

至於季尾表現回勇嘅禾確特，有指主帥鶴臣打算今仗對斯洛文尼亞搵佢打正選，取代愈踢愈曳嘅史達寧，而英國傳媒大爆，「禾仔」所屬嘅阿仙奴領隊雲格好想同佢續約，仲話大家傾約進度良好，睇嚟呢位仲有一年約滿嘅前鋒好大機會留隊，今仗又有得為國家隊擔正，可謂雙喜臨門。