智利要爆發墨西哥當災

猪拉多纳

明晨美洲國家盃上演A組次輪賽事，東道主智利將會火併墨西哥。智利雖然喺揭幕戰旗開得勝贏咗厄瓜多爾，但表現予人仲未谷起嘅感覺，王牌射手阿歷斯山齊士（A山）又開唔到齋，整體表現唔算對辦，令粉絲們唔多Like。今仗佢哋遇上半力出戰、兼有老將馬基斯上陣成疑嘅墨西哥，係時候要大爆發，贏番漂亮一仗冧番國民，讓球盤智利讓一球仍然不斷有飛落，足見各界對其信心十足，斯維決定再撐上盤。 （now 681周二早上7時30分直播）
主場要交貨 爭小組1哥

美洲盃揭幕戰智利贏咗厄瓜多爾兩粒，斯維推介嘅上盤亦順利開出，但如果有睇場波嘅讀者都知道，其實厄瓜多爾打得唔錯，一度令智利陷於苦戰，主帥森柏奧利更三度變陣，若非靠維達爾嘅12碼打破僵局，都未必贏波又贏盤。該仗後備入替嘅馬迪亞斯費南迪斯喺末段領紅被逐，今仗要坐波監，又傳維達爾臀部肌肉受傷，今仗需要紮住上陣，搞到森柏奧利可能會用番4人防線，以加固防守，以分擔維達爾喺中場掃蕩嘅工作。

不過，智利球迷一向要求高，就算愛隊上仗贏波，都未能令佢哋滿意。身為東道主，智利粉絲唔單止希望愛隊贏波，仲要贏得睇，依家講捧盃言之尚早，但小組首名出線乃係「最低消費」，今仗擊敗墨西哥，就好大機會達標。
馬基斯倦勤 利A山開齋

由於下月要出戰美洲金盃，墨西哥今次美洲國家盃冇選查維亞靴南迪斯、杜斯山度士兄弟等主力，盡遣二線兵，但勢估唔到首場對魚腩玻利維亞都贏唔到，認真羞家，最大鑊嘅經驗豐富嘅隊長馬基斯，喺該仗受傷上陣成疑，呢位36歲守將路數好又穩陣，冇咗佢後防有得震冇得瞓。而且智利王牌A山一向要威，上仗無私地助攻畀伊度亞度華加斯鎖定勝局，搣甩自私精嘅惡名，今仗對住半力出擊嘅「墨佬」，仲唔趁機爆一爆搶士哥。加上讓球盤智利要讓一球仍不斷落飛，由初盤嘅1.81倍跌到落1.78倍，備受睇好，上盤有計。