阿根廷要做大贏加

猪拉多纳

球王+野獸鋒力超勁

「百戰球王x野獸」聽朝出柙！美洲國家盃奪標熱門阿根廷，將會喺B組最後一輪分組賽面對牙買加，雖然領隊馬天奴停賽，但幾可肯定出局嘅牙買加已經較好晒時間鬆人，無心戀戰，適逢美斯第100次為國家隊披甲，泰維斯又難得擔正，呢鋪又點會放過牙買加吖？「-2」照捧2.15倍「讓主」啦！（now681台周日清晨5:30直播）

家陣喺B組同巴拉圭並列榜首嘅阿根廷，上仗憑阿古路一箭定江山贏烏拉圭開齋，「阿Kun」入波之後撞傷右邊膊頭，雖然呢位曼城射手已經復操，不過今戰對手只係牙買加，領隊馬天奴唔想主將有咩冬瓜豆腐，好大機會派泰維斯擔正攻堅。
美斯「百戰」大日子

「泰仔」今季勁弗，喺各項球會賽事攻入29球，難得擔正梗係要施展渾身解數。阿根廷傳媒爆料，迪馬利亞、奧達文迪，以及已經食咗兩張黃牌嘅門將羅美路、馬高斯盧祖同守將馬斯真蘭奴都會休戰，由拿維斯、班尼加同拉美拿打正選，呢班所謂「副選兵」全部係有料之人，對住牙買加，夠殺啦！仲有，今仗係美斯第100次為阿根廷國家隊披甲，前晚佢受訪時話，捧美洲盃係佢嘅夢想，加埋「百戰」呢個大日子，當然要做番齣好戲啦！
牙買加卜定機票走人

牙買加有幾水皮唔使多講，佢哋頭兩輪分組賽分別輸畀烏拉圭同巴拉圭1粒，鬥志同韌力睇落唔錯。不過牙買加兩戰全敗，出線機會微乎其微，今次以邀請隊身份出賽嘅佢哋，更已經Plan定比賽翌日就鬆人，足總亦安排晒唔同國家搵食嘅國腳搭邊班機走，即係一心等返歸，無心戀戰實輸鑊甘甘哋啦！ 美洲盃B組