歐戰往績贏晒 巴迪上盤遜得過

猪拉多纳

白俄羅斯巴迪過去四屆歐聯有三屆順利透過附加賽進身最後32強分組賽，歐戰經驗相當豐富，首回合主場面對不擅作客嘅塞爾維亞柏迪遜，小讓平半捧上盤。（有線63台周三凌晨2時45分直播）

今場對賽雙方都係歐聯外圍賽常客，不過成績卻差天共地，白俄羅斯冠軍巴迪對上四屆只有一次喺第二圈外圍賽出局，其餘3次去到附加賽階段都能順利過關殺入分組賽。相反塞爾維亞冠軍柏迪遜對上4屆都喺第3圈出局，最近一次喺附加賽過關係10/11年球季，當時柏迪遜兩回合要踢到加時才驚險淘汰安德列治，整體水平明顯不及巴迪，而且後者今季有前阿仙奴名將希比回巢，大賽經驗亦勝一仗。

巴迪近年喺歐洲賽主場屢有佳作，曾經贏過拜仁、畢爾包等實力分子。柏迪遜近期喺國內聯賽表現麻麻，連續兩場作客輸波之餘，仲失咗6球，難予球迷信心，巴迪讓平半可捧上盤。
艾斯坦拿折箭捱「細」界

另一場較早開波嘅賽事由哈薩克艾斯坦拿主場鬥塞浦路斯代表尼科西亞。哈薩克對上兩圈淘汰馬里博爾及赫爾辛基，表現討好，可惜今屆外圍賽入咗2球嘅主力前鋒杜馬斯今仗停賽缺陣，勢對球隊攻力有影響。尼科西亞有中場雲尼斯奧斯停賽，作客預計亦會踢得較保守，今場捧細盤啱數。（有線61、64、201及203台周三凌晨零時直播）