翻生費托再領馬體會衝頂

猪拉多纳

近年成功崛起成為西甲第三大巨頭嘅馬德里體育會，今年更獲中國富商王健林注資入股，有咗呢支大水喉射住，「床單軍團」新季使咗1.25億歐元（約10.7億港元）買入韋圖、恩歷克卡拉斯高等猛人，誓要再次挑戰巴塞同皇馬嘅王者地位，攞獎兼攞威！

馬體會呢個「神鋒生產地」今季喺波圖引入積臣馬天尼斯，及羅致維拉利爾上季首席射手韋圖，加埋留隊嘅基沙文，攻力可謂有增無減，不過講到星味同代表性，就點都係「王子」費蘭度托利斯。
前線火力有增無減

「費托」今年仲因為文迪蘇傑離隊，終於都有得做番「9」，再着9號波衫，加上佢有主帥施蒙尼錫住，趁積臣馬天尼斯未有咁快融入球隊，上季已經有少少復甦迹象嘅「費托」新一季隨時大爆發都唔定！