皇馬鑊氣夠 賓施馬復出擔正

猪拉多纳

皇家馬德里喺西甲首戰悶和希杭令人失望，今晚佢哋回師主場鬥貝迪斯，話晒係新季首次喺自己地頭出擊，加上箭頭賓施馬強勢復出擔正，相信主帥賓尼迪斯都會炒番鋪氹球迷，就算讓兩球都照捧1.82倍「讓主」。

（now632台周日凌晨4:30直播）

「銀河艦隊」上仗作客悶和弱旅希杭0:0，「肥賓」安排加里夫巴利踢進攻中場，點知做唔到奇兵之餘反而拖累球隊進攻。西班牙《馬卡報》早前做咗份民意調查，結果顯示巴利得嗰唔夠4成支持率，就知佢踢得有幾曳。相信呢鋪賓帥唔敢再玩嘢，繼續畀佢喺中路「搞破壞」。
貝迪斯缺雲達華治

就算「肥賓」真係冥頑不靈，皇馬呢鋪總算有賓施馬同占士洛迪古斯復出幫手。當中前者復出尤其重要，皆因呢位法國射手無論埋門同組織力，都比上仗踢正選嘅謝斯洛迪古斯優勝，有賓施馬助陣相信有助解放C朗不停開炮。何況貝迪斯今仗缺少中場馬迪拿、雲達華治幫手，怕且做定心理準備做炮灰都得咯。