紅魔力谷半場大

猪拉多纳

周日晚英超重頭戲，由史雲斯主場火併曼聯。買波嘅嘢唔可以「一本通書睇到老」，除咗做足功課，了解球隊踢法同近況等資訊外，雙方對戰時所產生嘅特性與火花，其實更有參考價值，雖然紅魔開咧後攻力似乎欠奉，但佢哋近3次造訪「天鵝堡」，全數開出半場入球大，況且隊長朗尼打破入球荒後信心大增，為報上季被雙殺之辱，肯定落場即搶，而且今場半場大又有分頭，梗係咪走寶。

(now 621周日晚11時直播)
迪比弗爆朗尼回勇

曼聯開季英超3戰全開入球細，兼只出現兩個入球，不過上周中歐聯附次回合突然撻番着，隊長朗尼更大演帽子戲法，破跨季10場正式比賽入球荒，助紅魔大勝布魯日4球晉級，佢即時信心返晒嚟。此外，「新C朗」迪比亦逐漸融入，「爆炸頭」費蘭尼又坐完波監可以復出，球隊又多一道破關板斧。上一周聯賽對紐卡素攻極唔入，反令曼聯眾將入波嘅意欲大增。

況且迪基亞轉會一事有新發展，據報曼聯為免只剩10個月合約嘅迪基亞下季自由轉會，喺金牌經理人佐治文迪斯做中間人下，同意將4,700萬歐元叫價減到4,000萬歐元（約3.5億港元），皇馬亦有信心最後可還價3,500萬歐元（約3億港元）成交。曼聯昨日又宣布將莊尼伊雲斯以600萬鎊賣畀西布朗，意味住以新門神羅美路、基斯史摩寧為首嘅防線主力大致敲定，軍心更穩。記得上季史雲斯兩循環雙殺曼聯，尹戈爾必視之為奇恥大辱，今仗兵臨「天鵝堡」，肯定會落柯打強攻復仇。
史雲斯遇強唔會守

不過，如果有留意開史雲斯，都知佢哋主場威力不容小覷，本季作客車路士兩度落後下都能逼和對手。前鋒巴菲迪比高美斯及新將阿休好使好用，中場悍將舒維爾更大熟大勇，中距離施射頻有斬穫。史雲斯今仗相信繼續其一貫全場壓迫嘅進攻足球；而對上3次主場迎戰曼聯，半場起碼會出現兩個入波，攤路清晰。上季史雲斯面對前四球隊，只有鬥阿仙奴嗰場未能開出半場大，可見速戰速決係「天鵝」嘅遇強殺着，一於捧半場大。