山度士托弗 下盤有利可圖

猪拉多纳

今輪巴甲有場好嘢值得留意，利斯菲體育會主場對山度士。包括聯賽及盃賽在內，老牌勁旅山度士已保持連續11場不敗，近5仗更係全勝，狀態弗到漏。利斯菲體育會就相反，近11仗只得1勝，睇見都唔開胃，山度士仲有得受讓平半，梗係揀客軍下盤。

（周一清晨5時30分開賽）
進攻鐵三角撻着

山度士季中一度陷入低潮，但由7月下旬開始演出大反彈，近11仗取得9勝2和佳績，包括喺巴西盃兩勝聯賽榜首球隊哥連泰斯，表現銳不可當。雖然山度士球星羅賓奴去咗中超搵食，但同樣効力過AC米蘭嘅射手奧利華拉大勇，近兩仗射入3粒，以14球喺射手榜遙遙領先。拍檔加比爾巴保沙及祖雲尼奧合共亦有9進帳，呢個進攻鐵三角着晒火，即使中場盧卡斯利馬入選巴西隊踢國際賽缺陣，山度士仍然夠殺。

利斯菲體育會雖然近3次主場對山度士都贏波，但今時唔同往日，球隊狀態處於低谷，近11場比賽只曾喺南球盃贏過1場，近兩仗連波都入唔到，後衞森姆沙維亞今仗停賽令防線雪上加霜，讓波不過係主場因素，揀番客隊下盤穩陣。