負傷「橙獅」出線細危荷蘭浴血土耳其

猪拉多纳

今晚歐國盃外圍賽A組爆發生死大戰，由「負傷的橙獅」荷蘭作客擁有地獄主場嘅土耳其。荷蘭新帥白蘭特上仗頭炮打唔響之餘，新隊長洛賓更因傷倦勤，不過近6次對土耳其未輸過之餘，更加全部開細，唔通真係命不該絕？荷蘭依家處於生死邊緣，面對競爭對手土耳其，略有差池隨時連小組第3位嘅附加賽席位都不保，今仗必定踢得更小心，首選入球細。

(有線61及201台周一凌晨零時直播)
保第3位不敢貿進

荷蘭嘅隊徽係一頭獅子，不過呢隻橙獅頭頭碰着黑，上仗由剛扶正嘅新帥白蘭特領軍，主場面對「一哥」冰島吃咗一記悶棍輸0比1，守將馬田斯恩迪領紅要坐波監外，新隊長洛賓更中途傷出，證實今仗對土耳其無法披甲。依家荷蘭落後冰島同捷克8分及6分，剩番3場比賽，要爭取頭兩名直接出線資格嘅機會已經非常渺茫。好彩土耳其上仗臨完場前遭弱旅拉脫維亞逼和1比1，令「火雞」仍以1分落後畀荷蘭，睇嚟呢隻「受傷獅子」仲有些少運仔。

老實講，荷蘭冇咗爆得又射得洛賓，尹佩斯、史奈達同亨特拉爾都明顯走下坡，「新C朗」迪比及韋拿杜姆亦未成氣候，斯維對「橙軍」前場嘅火力有所保留。土耳其只要今仗贏波，即以兩分之差反壓對手升上第3，大大增加得到附加賽席位機會，因此對荷蘭嚟講係不容再失，略有閃失連隨時附加賽都冇得踢，預計佢哋作客會踢得更加保守。
困獸鬥預咗少交收

睇番雙方近6次交手，荷蘭錄得3勝3和未輸過嘅成績，土耳其上一次擊敗荷蘭已經97年嘅事，證明「橙軍」對土耳軍心理上稍有優勢。不過呢6次碰頭，無獨有偶全部開出入球細，依家荷蘭前線啞火，土耳其對強隊唔敢輕舉妄動，況且佢哋亦摸熟晒喺土超搵食嘅尹佩斯同史奈達嘅路數，呢場「困獸鬥」好大機會少交收，斯維認為1.65倍嘅細盤乃不二之選。