華倫留力歐聯速食格

猪拉多纳

西甲啱啱踢完周中快車，星期六凌晨又嚟另一輪賽事，打頭陣嘅係華倫西亞主場對CF格蘭納達。兩支球隊都喺周中嘅賽事輸波，但華倫西亞回師主場表現始終有保證，今仗面對3連敗嘅CF格蘭納達，有望贏波終止近期嘅頹勢。而且華倫西亞下周中要踢歐聯，自然希望速戰速決盡早鎖定勝局，阿謙推介半場勝。

（now 632周六凌晨2時30分直播）

華倫西亞周中作客0比1不敵愛斯賓奴，近3場賽事都贏唔到，表現認真唔理想。華倫西亞近況唔好相信同早前歐聯分組賽主場輸畀辛尼特有關，球員一時間未能回復信心，加上正副選門將迪亞高艾維斯同馬菲賴恩皆有傷都踢唔到，自然令一眾球員有所擔心。不過，華倫西亞今仗回師主場出擊，球員心理上始終有啲優勢，加上下周中要踢歐聯分組賽，自然希望盡快收拾今仗嘅對手CF格蘭納達，等一眾主力可以早早休息，專心備戰嚟緊嘅歐聯分組賽，可以相信呢班波今場會有唔同嘅發揮。
CF格蘭納達3連敗冇起色

CF格蘭納達開季踢咗5場聯賽只係錄得1勝4負嘅成績，球隊近3場聯賽輸晒之餘更只係入得1球。佢哋今季作客雖然贏過波，但對手只係基達菲，實力同華倫有距離，所以參考價值其實唔高。CF格蘭納達今仗有中場魯賓佩雷斯同前鋒比迪受傷唔踢得，仲要作客面對矢志贏波重拾信心嘅華倫西亞，隨時半場都頂唔住對手嘅攻勢，今仗一於捧華倫半場勝。