水晶宮半場和好路

猪拉多纳

今晚英超獨腳戲上演屈福特主場對水晶宮，論戲碼好似麻麻哋，但今季英超估你唔到，好似韋斯咸及李斯特城呢啲中下游球隊彈出，而今晚對賽嘅水晶宮同屈福特排名仲高過衞冕車路士同利物浦，證明佢哋有番咁上下斤両。而且今場波有條好路畀大家，水晶宮連續7場波開出半場和，一於再追！

（now 621周日晚11時直播）

《東方波經》喺英超開季前就同大家推介過，話水晶宮喺柏杜領軍下係值得長追嘅「銀行球隊」，見到佢哋季初嘅表現，就知《東方波經》冇介紹錯！水晶宮踢咗6場聯賽得9分排緊第8，試過作客擊敗車路士，對住曼城同熱刺都只係僅敗1球，所以今晚作客升班球隊屈福特，受讓固然捧得過，但科娜推介另一條好路畀大家，就係有2.05倍嘅半場和。

主隊屈福特6場英超入得5球咁大把，前鋒恩哈路一個人就佔咗4球，即係話只要凍結到呢位尼日利亞射手，屈福特就好難有波入！水晶宮領隊柏杜今季從巴黎聖日耳門買入舊部卡比耶，呢位29歲中場踢紐卡素時出名組織力強，助攻遠射都好鬼勁，佢依家已經轉型成一位防守中場，但做「掃把佬」一樣有貨交，今季場均有4.8次攔截，有呢位英超「防守王」鎮守中場，水晶宮半場要守住屈福特真係易過借火。
水軍近7戰全部下半場爆發

水晶宮慣性下半場發力，上周中英聯盃對查爾頓雖然大勝4比1，但其實上半場都係打成0比0，近7場賽事都開出半場和，而對手屈福特近5場聯賽亦4次開出半場和，今場唔追半場和就走寶喇！