曼巿雙雄今晚贏德未？

猪拉多纳

喺英超排頭兩位嘅「曼市雙雄」曼聯同曼城，今晚於歐聯分組賽雖分途出擊，但咁啱得咁蹺都係出戰德甲球隊，由於曼市雙雄喺首輪賽事齊齊輸波，今輪再有差池，隨時影響各自出線形勢，尤其係身處「死亡D組」嘅曼城，究竟呢對同市死敵能否嚟個大反擊贏「德」？
紅魔有火爆堡出生天

事隔860日後重登英超榜首嘅曼聯，今晚喺歐聯B組主場迎戰德國「4哥」禾夫斯堡，紅魔首輪意外地落筆打三更，今仗唔敢再輕敵全力求勝，適逢隊長朗尼打破聯賽入球荒，士氣正盛，絕對唔赦近況麻麻嘅「狼堡」，主W乃不二之選。

（有線61及201台周四凌晨2時45分直播）

紅魔喺分組賽首輪作客於領先下遭燕豪芬反勝，今仗回師主場肯定為咗3分全面搶攻。講火力，曼聯喺近5場比賽贏4仗，嗰4仗都轟入3粒，證明主帥尹戈爾已改善球隊季初守強攻弱嘅問題。除咗新兵安東尼馬迪爾加盟後5仗入4球堅搶鏡外，佢對新特蘭更助攻朗尼入波，兩人似乎愈來愈夾，而呢球亦係朗尼跨季長達11場聯賽首個士哥，肯定幫到呢位隊長重拾信心，火力全開唔係人咁品。
禾夫斯堡防線甩漏多

相比之下，禾夫斯堡嘅近況認真一般，近兩場聯賽不勝，當中最令人驚訝，係上周中快車作客拜仁領先一粒，卻喺下半場畀對方箭頭羅拔利雲度夫斯基於9分鐘內連轟5粒輸波，以甩甩漏漏見稱嘅丹迪為首嘅防線震過貓王。同時，主帥赫基又接連公開批評麾下前鋒巴斯杜斯同舒賀爾尼，唔多唔少都影響軍心，加上中場悍將路爾斯古斯達禾因傷缺陣，點頂得住來勢洶洶嘅紅魔呀？1.65倍主W不容錯過。
藍月亮細嗒慕遜加柏

曼城上周六「來回地獄」，喺英超作客畀熱刺大炒4比1，今晚嚟到歐聯D組作客慕遜加柏，當然想贏波「折返人間」！「藍月亮」今輪面對被視為組內最弱嘅慕遜加柏不容再失。不過曼城歐聯客場出戰作風保守，上屆4仗作客賽事有3仗總入球喺2球或以下，睇嚟佢哋今場頂多小勝，1.77倍嘅客勝值博，但捧2.02倍嘅細盤就仲和味！

（有線64及203台周四凌晨2時45分直播）

曼城於死亡D組首仗喺領先1球嘅大好形勢下，被祖雲達斯連入2球輸波收場，慕遜加柏亦輸畀西維爾全失3分，邊隊今仗再輸出線形勢會更惡劣，預期雙方今仗都會先求穩守。
歐戰作客例縮住踢

曼城對上4屆歐聯2次分組賽出局、2次16強被淘汰，喺歐洲賽場從來都唔可以以強者自居，所以踢法比起喺英超比賽時有一定出入，尤其作客出戰更保守。曼城上屆歐聯踢咗4場作客賽事，只有面對實力次一級嘅莫斯科中央陸軍出現大手交易，打和2比2，其餘對住拜仁、羅馬或巴塞隆拿都歎慢板，入球、失球數字都極低。

連埋歐聯淨吞西維爾3蛋，慕遜加柏開季6場正式賽事全敗，教頭法夫爾辭職，由青年軍教頭舒伯特頂檔，球隊經換帥後表現有明顯進步，首戰以4比2擊敗奧格斯堡取得今季首捷，上仗聯賽作客史特加亦贏3比1。不過去到歐聯戰場，舒伯特同球員喺經驗方面始終較輸蝕，而且經過季初災難性演出，就算有主場之利亦唔敢貿貿然主攻，對住有中場耶耶托尼缺陣嘅曼城，今場開細嘅機會高。