三獅玩泥「沙」 「細」在必行

猪拉多纳

篤定出線未必踩油

今晚繼續有歐國盃外圍賽陪住大家，其中喺E組取得全勝佳績、肯定提早出線嘅英格蘭，會喺主場迎戰仲要爭附加賽資格嘅愛沙尼亞。雖然「三獅軍團」致力以10戰全勝佳績殺入決賽周，之不過一眾英軍鋒將狀態麻麻，就算贏到都冇咁易可以狂數對手，2.3倍入球細不妨一試。

（有線61及201周六凌晨2:45直播）

「三獅軍團」喺今屆歐國盃外圍賽表現係醒嘅，佢哋唔單止提早出線，而且仲成為咁多組入面唯一一支錄得全勝嘅隊伍。難怪前鋒禾確特賽前都話想締造10連勝作結：「雖然大家認為呢組實力唔係強，但其實每場國際賽都好難打，能夠做到小組全勝紀錄都係一項成就。」
英格蘭鋒線啞火

筆者唔會懷疑三獅兵想贏波嘅決心，之但係贏波唔等於要炒起對手啫，咪忘記今季英超競爭前所未有咁激烈，喺國家隊已經鎖定出線席位情況下，一眾三獅兵落到場仲會出幾多分力先？話唔埋班波一入咗球就會即刻收油。

再講前鋒朗尼同丹尼艾格斯前日缺席球隊操練，怕且上陣機會唔大，睇番家陣「三獅」前線人選狀態，好難旨意佢哋炒得起對手囉！哈利卡尼、史達寧今季聯賽各自入得1粒，禾確特叫做醒啲，不過都係攞到2個聯賽入球。成班箭頭腳風都唔多順，唔通旨意冇乜國際賽經驗嘅占美華迪大發神威幫手咩！
愛沙尼亞防守硬淨

愛沙尼亞雖然名氣欠奉，但勝在實而不華，小組8戰僅失6球，失球數字比瑞士仲低，證明佢哋條後防並唔係紙紮咁脆弱。加上佢哋落後第3位嘅斯洛文尼亞2分，緊守第4位，仲有機會爭附加賽資格，今仗對住踢風流波嘅英格蘭，實搏埋條命搶分都似，冇咁易慘敗收場囉！