|
柏威廉一於愛情結晶品至上，女朋友大肚，陪佢返去老家安胎。其實佢喺呢度都幾吃得開，贏馬數量表面唔算多，得11W而已，之但係，睇番嗰啲頭馬係出自邊度吖，蔡約翰有之，沈集成與賀賢亦有，最難得連出名用人嚴格嘅大摩，早前一樣有關照，就知佢線路幾廣吓。至於呢期告別戰佢出馬唔係多，6匹咁大把啫，雖然話人在人情在，好在一班同聲同氣鄉里冇即時閂水喉，6 駒當中有5 隻來自澳系。
坦白講，呢個年頭仲邊有話贏馬送行，不過，柏威廉呢期啲馬又未至於全部係沙包（捱打），至少第三、五、九場都有啲希望，佢在港拉士一期嘞，搵得幾多奶粉錢點會唔搵，呢日要搵個最好鬥志嘅騎師，可能就係佢。一於整條3x7 獨贏過關，再補一條3x1P。
第三場「電訊高星」，表面上在三班跑兩場都輸，仲要愈輸愈遠，好似高攀唔起呢個班次，不過，如果有睇佢呢兩場點跑，前仗直路走入內叠取位，自己攞嚟塞車，上場則沿途外叠蝕，呢兩場處理手法真係睇到眼冤；今場用柏威廉，隻馬係咪唔夠班，會有進一步答案。而第五場「駿馬繽紛」，四班1400米算係有頭有面，一檔又好跑，如果呢場冇乜步速，佢可能食正晒形勢！
鎗臣輕磅偷雞
第九場「鎗臣」，剛仗1800米明顯輸最後一百幾十米，睇嚟目前韌力仍未足以掹到長途，但另一方面，對住「極品絲綢」等好手，可以輸唔係好遠，二班又未必冇碇企噃。總之今場返番田草1600米，以佢前次孭到133磅只係輸條頸畀「披星戴月」，今次116磅，就算對手係難啃，亦未必偷唔到雞。
亨利 | 
金睛卡
发表于 2010-1-31 10:17
变色卡
显身卡