馮諾嘉手記：蓮華生輝賺分橫掃

纯情小彩迷

　　今日沙田十場賽事，當中有兩場重頭戲，第七場百周年紀念短途盃同第八場董事盃，都係本地一級賽，參戰馬分量當然有番咁上下，相信會有激鬥。

　　第七場跑1000米，參戰馬只得九匹，小妹最睇好嘅當然係「蓮華生輝」，短途大賽向來都係佢嘅囊中物，今季兩戰獲冠亞各一，喺香港短途錦標預賽，遇強敵「鳥語花香」屈居亞軍，但喺香港短途錦標成功壓倒「同一世界」、「時尚風采」同「綠色駿威」奪冠，睇番今場對手，其實同上一場差唔多，評分僅次於「蓮華生輝」嗰三匹馬，上場都係佢嘅蹄下敗將，再次同場較量依然信心十足，評分最高跑平磅賽當然惡晒，一於做膽。配腳拖番上次跑二、三名嘅「同一世界」同「時尚風采」，仲有當起嘅「紀利威龍」。

好爸爸一哩秤先

　　第八場董事盃係三冠大賽首關，路程1600米，次關係2000米嘅香港金盃，尾關2400米遮打盃，三關嘅途程都唔同，有能力贏長途嘅馬，有長力又未必有中距離嘅衝刺力，所以睇番以往咁多屆，要贏晒三關真係難上加難。呢場睇好「好爸爸」，雖然唔係佢最當銳嘅時期，但有時跑馬仲要睇運氣同對手，何況佢嘅一哩實力咁雄厚。

　　呢場本來有馬可以威脅「好爸爸」，就係贏過「蓮華生輝」嘅「鳥語花香」，早前試閘後驗出氣管有血而退出，對「好爸爸」嚟講係少咗個勁敵，「好爸爸」上場再添頭馬進帳，對馬主有所交代，亦成功三奪香港一哩錦標，但「好爸爸」上仗只係僅贏大熱門「鳥語花香」半個馬位，今場如有機會再較量過，當然有得鬥喇！再數落去，論一哩實力，應該輪到「再領風騷」同「友誼至上」，同埋級數高但路程稍短嘅「閒話一句」，呢三駒當然係配腳之選。

　　另一場心水場次係第九場二班1600米，用「按得快」做膽，雖然今場有對手，但係睇番上場獲季軍嘅水準絕對唔弱，只係輸頭馬四分三身位，差啲爆出56倍大冷W，今場操足再出，出王牌報名不容輕視。配腳方面，「朝東之寶」同「鎗臣」路程正宗，「藍天」有柏寶壓陣，都有爭三甲實力。