盃賽4重奏 球迷大飽眼福

猪拉多纳

史浩克死火讓唔起慕遜加柏

音樂演奏領域入面有所謂「弦樂四重奏」，即由兩把小提琴、一把中提琴及一把大提琴組成嘅演奏團體，多首經典作品都令人聽出耳油；今日球壇都嚟個「盃賽四重奏」，多支強隊喺本土盃賽分途出擊，讓球迷大飽眼福！

今晚德國盃繼續上演第2圈，史浩克04主場對慕遜加柏，兩隊咁蹺剛喺上輪德甲聯賽交手，慕遜加柏主場贏3比1，絕對有參考價值。雖然今仗主客對調，但以史浩克近期頹勢，加上防線又差，即使有地利亦讓唔起對手，撐慕遜加柏讓球客勝。

（TVB 13周四凌晨3時30分直播）

史浩克04早前曾連贏6場，但之後無以為繼，近4仗僅1勝，上仗德甲鬥慕遜加柏亦捱打，破蛋1球都係靠對手擺烏龍，尾段仲有中場祖漢斯基斯被逐。上季首席射手亨特拉爾狀態大不如前，史浩克今季德甲入波數字仲少過下游球隊法福克福、史特加，一支入波能力低嘅球隊，實在冇乜本錢讓波。

慕遜加柏今季出戰歐聯，但分組賽3戰得1分，出線機會好微，應會注重番本土賽事。事實上佢哋喺聯賽取得5連勝，可見對番「自己友」比較有信心。球隊上屆德國盃打入8強，屬有心爭盃分子，受讓抵玩。
多蒙特着火炒起乙組仔

另一場第2圈賽事多蒙特主場對柏達邦，多蒙特的奧巴美揚絕對係歐洲當紅射手之一，近兩仗都演帽子戲法，拍檔上馬高列奧斯亦重拾射手鞋，加埋香川真司、米希達利恩等人支援，就算半力出擊都炒得起乙組仔柏達邦，多蒙特讓兩球都直取讓球主勝。

（TVB 13周四凌晨2時直播）