新星博上位巴塞獵殺丙組仔

猪拉多纳

上屆西班牙盃盟主巴塞隆拿今晚喺第4圈首回合展開衞冕第一擊，作客對丙組仔維拉奴雲斯。多線作戰嘅「地上最強」兵源單薄，預計主帥安歷基今仗會輪換畀部分主力休息，一班新仔好似蒙尼亞艾哈達迪同辛度拉美利斯，難得擔大旗必定搶韁，維拉奴雲斯質遜難擋，直取讓球客勝。

（周四凌晨3時30分開賽）

巴塞上屆榮膺三冠王，但因轉會禁令關係，買番嚟嘅阿歷斯維度同阿達杜倫要明年1月先用得，最弊係傷兵浪潮，美斯、拉芬拿艾簡達拿、沙治羅拔圖等先後受傷，令原本兵源唔多夠嘅巴塞更見單薄，尼馬、蘇亞雷斯等場場打冇得抖，點會唔攰爆。
近3屆首擊例演大屠殺

不過巴塞今仗難得對住丙組仔維拉奴雲斯，主力們終於可以抖抖，預計會見到一班新仔好似蒙尼亞艾哈達迪、辛度拉美利斯及馬斯巴查落場，其中蒙尼亞艾哈達迪早前歐聯對利華古遜，後備入替更交出助攻，今仗佢哋可以擔正，梗係要爭取表現喇。況且巴塞之前3屆於第4圈首回合，均作客以4比0勝侯爾斯卡、4比1勝卡達真拿、3比0勝艾拉維斯，區區維拉奴雲斯又點擋得住呢？就算巴塞要讓二球，照撐讓球客勝。