馬主論戰

纯情小彩迷

寶貝王子補中

　　方嘉柏谷戰成績突出，今晚一於繼續吼實佢手馬，最啱心水係第七場「寶貝王子」。以往跑過兩次谷草一哩都入Q，上仗亦只係輸畀「一團威」個幾馬位得第二，今次捲土重來用巫斯義執韁，可以補中。

　　另一匹要留意嘅方廐馬係「紅封包」，以往五戰谷草1200米獲得一冠一亞兩季，證明路有專長。今次呢隻馬再跑強項路程，用楊明綸減磅上陣之餘，仲要抽埋個一檔靚位，預期可以全程守好位競逐，形勢相當有利，贏面極大。

梁廷鏘

寶貝王子劍鋒施回馬槍

　　今晚我鍾意第六場「劍鋒」，前仗初跑谷草1200米，以輕鬆姿態一放到底，證明窄場性能出色。上仗初跑三班賽，仲要全程走二叠望空，落敗並唔出奇。今次呢隻馬再跑贏馬路程，雖然排十二檔起步，但勝在前速夠快，影響應該唔大，隨時可施回馬槍。

　　另外推介第二場「神州穿梭」，雖然在港跑過多仗都未出頭，但本身實力唔曳，上仗跑谷草一哩亦不過僅以短頭位輸畀「瀟灑財星」，今次吼準條件限制賽上陣，一定搏盡贏番場。

任達華

健康藍莓食得

　　韋達近期手風幾順，我睇好佢今晚繼續有馬贏，其中最鍾意第四場「健康藍莓」，呢匹Danewin子嗣質素唔錯，上場響泥地都幾乎贏馬，肯定有分在手。今次跑番贏馬路程谷草一哩，搵埋韋達操刀，排埋三檔隨時可以一放到底。

　　另一匹韋達坐騎鍾意「精算攻略」，上場跑谷草一哩，末段一踩油即交出凌厲後勁，實力絕對唔簡單。今次升上三班作賽，對手實力無疑係強咗，但亦因此可以負輕磅上陣，話唔定會交出更勁走勢，一於吼實佢。

張敬山