修咸頓南岸打吡攞威

猪拉多纳

廣布炮台 近況起飛

英超今季有新嘢睇，就係修咸頓同般尼茅夫呢對南岸孖寶好戲，佢哋今晚合演打吡，氣氛肯定一流，但戰情就未必緊湊嘞！畢竟「聖人」近況起飛，前中後三線都擺滿炮台，對住攻又唔得守又唔掂嘅般尼茅夫，讓一球梗係捧上盤啦！

（now621台周一凌晨零時直播）
般尼茅夫黑過墨斗

自從9月底輸完畀曼聯之後，修咸頓打後6場波攞到4勝2和佳績，當中包括大勝車路士呢場代表作。迄今喺所有賽事已累積8個入波嘅「型男」加斯安奴柏利，固然係「聖人」戰績穩步上揚嘅功臣，查實中場雙翼沙迪奧文尼、杜辛泰迪治，以及守將華基爾雲迪積克都入過波，前中後都布滿炮台，問你點頂？

對家般尼茅夫黑過墨斗，最做得嘢嗰件射手哥林威爾遜重創長抖，麥斯格拉度同守將泰朗明斯又加入傷兵行列，就連隊長兼後防支柱湯美艾菲克都飛埋去瑞典做右膝手術，預計至少要抖8個星期，本身隊波已經渣，家陣仲要天殘地缺，睇嚟都有排輸咯！