熱刺追殺維拉

猪拉多纳

哈利仔搵番射門鞋

今晚英超壓軸好戲，熱刺主場迎戰包尾嘅阿士東維拉。維拉上周請咗領隊舒活食「無情雞」，至今仍未搵到新帥接手，連同啱啱喺英聯盃出局，近8仗輸咗7場，士氣直插谷底，相反熱刺射手哈利卡尼腳風轉順，梗係唔會畀佢停，食住個勢痛打落水狗，一於直取讓球主勝。

（now 621周二凌晨4時直播）

今仗焦點本來係維拉領隊舒活倒戈舊東家熱刺，點知上周輸畀史雲斯後收到「大信封」，呢位上季帶領維拉護級成功兼殺入足總盃決賽嘅少帥，今季帶隊12仗正式賽事贏得兩場咁大把，難怪高層忍無可忍炒咗佢，而對史雲斯賽後，隊長米卡李察士仲同對方球員喺通道發生衝突，被英國足總起訴行為不檢，由於維拉決定唔上訴，可能今仗要坐波監。
維拉炒咗舒活無王管

最弊係維拉炒人容易搵人教難，上周傳同前里昂教頭加迪好事近，加迪想帶埋兩位以前跟開佢嘅助手真尼斯奧及巴迪基利過檔，不過兩位助手同里昂仲有合約在身，里昂又留難唔放人，搞到單嘢hold住咗。衰開有條路，看守領隊奇雲麥當奴只係平庸之輩，上周中佢帶隊喺英聯盃16強以1比2不敵修咸頓出局，維拉近8仗輸咗7場，士氣極度低落。

對手熱刺都有唔少「十字兵」，孫興民、查迪尼、賓達納及阿歷士柏列查特全部因傷缺陣，好彩仲有哈利卡尼撐住。上季大爆發嘅「哈利仔」，今季成為眾矢之的，前9輪聯賽只入1粒，不過佢冇失去信心，上仗反勝般尼茅夫5比1之役，哈利卡尼大演帽子戲法，重拾射門鞋，加上基斯甸艾歷臣傷愈復出後，熱刺進攻組織順番好多，面對問題多多嘅維拉可大勝一場，斯維捧讓球主勝。