假如我是…？ ：貪字得個貧

纯情小彩迷

　　這陣子一班馬友圍埋食飯，每次話題都不是跑馬，或者，近兩次賽事，的確沒有甚麼特別，當中沒有一位朋友大勝，亦沒有一位大敗，可算是很平淡的度過。當然，亦是因為過去一個星期，有比跑馬更重要的時事話題吧。早點的，就是馬頭圍道塌樓，今時今日的香港，竟然仍可以有這種事發生，大家都覺得很不可思議，半天災事件，大家都只有慨嘆而已。

　　周中就到千億爭產案，人為的財產糾紛，當然大家都加把口。其中皮亞就最肉緊，明明唔關佢事，得知結果，竟然高呼萬歲，而且成餐晚飯由頭帶到尾，好像人家慈善基金佢都有份一般。

　　他解釋，話法官判斷非常有理，大拿拿千幾億，亦冇理由完全交俾一個冇血緣的人。而且，敗訴那位仁兄，前後都收咗超過二十億，你認為呢個世界上，有幾多人有二十億？我當然問他，其實是不是出於憎人富貴的心態？他就謂，這不叫做憎人富貴，而係教精大家，貪字得個貧，別那麼貪心，就已經袋袋平安。這個法則，放諸馬場一樣合用，講到咁大條道理，邊夠佢講？

荊山玉老馬識途

　　今日喜歡一匹老傢伙，就是第四場「荊山玉」，九歲老馬在香港已經出賽超過一百次，但今季依然一再有好表現，實在難得。慢熱馬季內跑過多仗，狀態更見磨起，泥地出色之外，後上力也強，這類馬，論作戰經驗，質新馬難以相提並論，且後上馬，排大外檔亦沒有所謂，必成冷門，不妨一試。

Andy