三箭衝冠直路起飛腳

猪拉多纳

日職次階段爆發前列大戰，暫居第4嘅大阪飛腳主場迎戰榜首嘅廣島三箭。三箭目前領先第2位嘅鹿島鹿角3分，而且得失球差有12個淨勝球嘅壓倒性優勢。由於次階段只剩低兩輪賽事，若三箭今仗全取3分幾可篤定在次階段封王，關鍵時刻戰意加零一，有力擊敗狀態與士氣甚差嘅飛腳，三箭受讓平半梗係捧下盤啦！

（有線61及201台周六下午1時直播）

三箭能夠喺次階段取得如此優勢，主要原因係作客表現非常出色。三箭喺次階段7場日職作客賽事取得全勝且合共轟入22球，包括擊敗首階段冠軍浦和紅鑽。三箭陣中最火熱嘅球員首推巴西前鋒戴恩費斯杜格拉斯，此子喺次階段15仗聯賽轟入11球，而且客場表現特別醒神，近3仗聯賽客戰都有「士哥」，今仗有力再取入球助三箭一圓錦標夢。

事實上，飛腳實力不在三箭之下，可惜球隊征戰太頻繁，嚟到季尾明顯出現疲態。飛腳近期接連遭受打擊，先喺亞冠盃被FC廣州踢出局，上周聯賽盃決賽更慘吞鹿角3蛋。飛腳目前陣營士氣低落，今仗應難擋全力爭冠嘅三箭，主場小讓平半都捧唔過。
橫濱水手作客脫鹿角

另一場由排第2嘅鹿角主場對排第3嘅橫濱水手，鹿角剛喺日聯盃擊敗飛腳捧盃，球隊相信仍沉醉於勝利嘅喜悅。鹿角現時喺次階段賽事落後榜首嘅三箭3分，為爭冠軍今仗形勢上可以話係非勝不可。不過，今場作客嘅水手自踏入8月後都未輸過，12場波錄得8勝4和佳績，今仗有力全身而退，一於捧讓球客勝。

（周六下午1時開賽）