東西岸4強爭入決賽盡砌

猪拉多纳

杜奧巴孭飛衝擊反客為主

東岸4強次回合矚目大戰，哥倫布機員主場對蒙特利爾衝擊，焦點集中喺衝擊射手杜奧巴身上，雖然「魔獸」首回合冇波入，但仍大大牽制對手防線，率領衝擊贏2比1，機員今仗焗攻求收復失地，後防難免比較空虛，相信杜奧巴不乏搵食機會，蒙特利爾衝擊仲有得受讓，必捧讓球客勝。

（TVB 301周一早上6時直播）

蒙特利爾衝擊能夠以東岸第3位參加季後賽，近6仗入5球、協助球隊5連勝嘅杜奧巴功勞最大；衝擊首回合即使先失波，仍然能夠反敗為勝，可見信心及士氣處於巔峰。同埋蒙特利爾衝擊領先1球，今仗可以睇定嚟踢，哥倫布機員焗攻隨時得不償失，一旦急於搶攻畀杜奧巴得手，就更加難翻身。機員現時形勢進退失據，加上近5次對蒙特利爾衝擊輸咗4次，信心都輸蝕，讓唔起對手。
紅牛超班半場KO華盛頓聯

另一場東岸4強次回合，紐約紅牛主場對華盛頓聯隊，常規賽冠軍紅牛首回合作客都贏1比0，實力明顯凌駕對手。紅牛近10場美職主場贏咗9場，當中8場上半場已領先，今仗主W1.36倍熱爆冇肉食，不妨揀1.8倍半場主勝。

（周一凌晨4時開賽）
海灣者火猛大起FC達拉斯

西岸4強次回合，FC達拉斯主場惡鬥西雅圖海灣者。奪冠次熱門西雅圖海灣者首回合憑丹普西射入致勝1球，2比1反勝FC達拉斯。呢位32歲前鋒近3仗都有波入，配合馬田斯堪稱夢幻組合。FC達拉斯身為常規賽西岸盟主，亦非泛泛之輩，落後下返主場冇保留，揀入球大。

（TVB 302周一早上8時30分直播）

西雅圖海灣者常規賽成績雖然麻麻，但呢班波人腳鼎盛，丹普西、馬田斯都曾於英超打滾多時，兩人今季常規賽共轟25球，無疑係美職最強鋒線組合，後備席上仲有巴拉圭國腳希度華迪斯，但球隊人腳「頭重腳輕」，驅使佢哋傾向主攻，即使領先亦唔會刻意死守。

FC達拉斯今季表現驚喜，佢哋首回合作客海灣者，臨尾大意失波輸1比2，認真唔抵。FC達拉斯勝在「位位射得」，今季有12位球員曾入過球，有足夠籌碼同海灣者火併。
白帽伐木者鬥穩陣吼細盤

另一場西岸4強次回合，溫哥華白帽主場對波特蘭伐木者，兩隊首回合打和0比0，即係今場一戰定生死，相信兩邊會穩陣行先，以免出錯冇仇報。事實上雙方近3次交手都打和兼全開細，預料膠着居多，首選入球細。

（TVB 301周一早上11時直播）