巴塞讓球和啱口味

猪拉多纳

4鬥維拉利爾全煲魚生粥

西甲今晚重頭戲，巴塞隆拿主場迎戰維拉利爾。巴塞箭頭尼馬、蘇亞雷斯近八仗狂轟十七球，已經適應「沒有美斯的日子」，不過佢哋近四次鬥「黃色潛水艇」都係小勝一粒煲魚生粥僅僅熟，今場主W熱至1.22倍冇肉食，建議捧3.8倍讓球和。

（now 632周日晚11時直播）

維拉利爾自從於13/14球季重返西甲，聯賽四鬥巴塞雖然全部輸晒，不過四次都係僅負一球，而且當中仲有兩次先入波，表現唔失禮。現任教頭馬斯連奴喺13年接掌「黃色潛水艇」之前，曾經帶領西維爾喺11年作客魯營打和巴塞0比0，應付「地上最強」似乎特別有心得。維拉利爾今季開季成績理想，頭六輪聯賽五勝一和一度排榜首，就算之後經歷三仗不勝小低潮，上仗反彈擊敗實力不俗嘅西維爾，信心、士氣應有所回升。
國家打吡前避添傷兵

巴塞方面，唔計西盃作客鬥低組別嘅維拉奴雲斯，尼馬同蘇亞雷斯喺對上八場加埋入咗十七球，攻力完全冇受美斯缺陣影響，不過正當中場恩尼斯達可以復出，另一中場拿傑迪錫上仗歐聯對巴迪又受傷，傷兵問題依然困擾着巴塞。下個禮拜係國際賽檔期，之後一班國腳返到巴塞就要作客皇馬進行國家打吡，為免繼續增添傷兵，巴塞今仗贏夠隨時收韁，一於博佢哋小勝開讓球和。