打吡日連環駁火

猪拉多纳

羅馬鬥拉素入球騷娛賓

今日德意法「打吡日」，激戰連場！德甲魯爾區打吡戰多蒙特硬撼史浩克04，「蜜蜂兵團」強勢乘勝追擊，射爆死敵；意甲首都內戰，羅馬對拉素肯定飛沙劈石；仲有法甲中部打吡，里昂對聖伊天，同樣劇力萬鈞，打吡連環鬥肯定睇到球迷熱血沸騰！

意甲「首都打吡」羅馬主場對拉素，兩隊一直共用奧林匹高球場，每次交鋒都當正自己地頭出擊，盡情搶攻。特別係羅馬今季大踢性感足球，可以話有前冇後，拉素進攻點亦夠多，肯定唔赦死敵。預料兩軍會鬥攻，入球大屬不二之選。

（TVB 302周日晚10時直播）
入球數字冠絕意甲

羅馬首11輪聯賽已轟入25球，火力冠絕意甲，皆因會方今季簽入「埃及美斯」穆罕默德沙拿，呢位23歲翼鋒上季被車路士外借去費倫天拿，表現光芒四射，今季轉投羅馬演出仲搶眼，至今已有5球進帳，佢拍住另一新兵迪斯高呢對新組合大大提升球隊火力，唔好忘記謝雲奴、費奧倫斯亦不時建功，進攻人腳眾多，即使「罰球專家」比真歷停賽，亦無損羅馬攻力。

不過羅馬防守麻麻，聯賽僅1場冇失波，近11場賽事有10場開大，當中8場總入球更係4球或以上，今場大細中位數維持2.5球，大盤抵玩。尤其拉素同樣踢法進取，球隊最大殺着係兩位中場菲臘安達臣及碧基亞，兩人今季聯賽合共已有7球進帳，足以撕開羅馬鬆散防線，勢必上演入球騷。