紐約紅牛恰慣華盛頓聯隊

猪拉多纳

近5次主場交鋒全勝

美職季後賽4強次回合今晚展開！紐約紅牛喺東岸4強首回合作客1:0擊敗華盛頓聯隊，贏波兼拎到寶貴嘅作客入球，今場大把本錢睇定嚟食，唔好忘記紅牛已經連續5次喺主場擊敗華盛頓聯隊，明顯係「格食格」，今場再追主勝先係明智。

紅牛今季決心捧走美職季後賽錦標，常規賽季尾已經提前開Turbo，計埋首回合賽事，近6場賽事踢出5勝1負佳績，球隊無論信心及狀態都處於高峰，前線巴利胡禮菲臘斯當然弗爆，後防新星美亞斯加亦盛傳受到車路士等歐洲大會垂青，有前有後絕對係捧盃熱門。
客軍防線曳焗攻不利

何況紅牛主場鬥華盛頓聯隊一向佔優，連續5次喺主場擊敗對手，球員未踢已經有心理優勢。落後嘅華盛頓聯隊今仗焗住要搶攻，之不過他們作客防守極不穩陣，近5仗作客比賽合共失守14次，今場被迫進攻難免暴露後防更多漏洞，再輸多場機會極大。