波斯狼人狂噬英超雜牌軍

猪拉多纳

羅馬孖寶腳風順狀態弗

力爭首度躋身歐國盃決賽周嘅波斯尼亞，喺分組賽強勢衝線奪得第3名，今晚佢哋喺歐國盃外圍賽附加賽首回合鬥愛爾蘭，「雌狼孖寶」迪斯高同比真歷最近喺羅馬踢意甲踢到曉飛，絕對有力帶領球隊砌低天殘地缺嘅愛爾蘭，捧波斯尼亞先下一城，撐1.77倍主勝。　

（有線61、64、201、203及中央5台周六凌晨3:45直播）

波斯尼亞未能夠直接躋身決賽周，查實係自己攞嚟衰，佢哋喺B組分組賽出閘脫腳，先後輸畀塞浦路斯同以色列，好在之後回復水準，喺最後3輪分組賽贏晒攞番個第3名，當中包括淨勝威爾斯兩蛋嘅代表作，證明呢班波走勢夠晒猛，信心都返晒嚟！
波斯尼亞歐國外三連勝

最重要係，喺分組賽頻頻因傷缺陣嘅前鋒迪斯高已經復出，並喺羅馬最近歐聯鬥利華古遜同拉素兩仗入波，腳風同狀態都冇得頂。加埋迪斯高嘅「雌狼」拍檔比真歷又係Fit，今季意甲已經斬獲5球進帳，有呢對「雌狼孖寶」衝鋒陷陣，愛爾蘭肯定有得震冇得瞓。
愛爾蘭三線殘到爆

睇小愛爾蘭，皆因呢班波近年畀人「英超雜牌軍」嘅形象，最濕滯係佢哋家陣傷兵滿營，除咗話門將基雲因傷退隊之外，另一守門員洛艾利洛同前鋒沙恩朗都有傷在身，好大機會缺陣。至弊係後防大將奧沙同前鋒約拿芬禾達斯要喺首回合停賽，前中後三線都削晒喎！齋睇前線要靠35歲嘅羅比堅尼搭住英冠葉士域治嘅戴利梅菲攻堅，已經唔開胃啦，首回合睇怕都好難全身而退。