羅奇代爾認真Mode頂到半和

猪拉多纳

今晚英甲早場羅奇代爾主場對韋根，雙方均喺周中踢完英錦標，羅奇代爾不敵乙組仔摩甘比出局，而韋根則以4比0大勝黑池，不過羅奇代爾輸波全因留力，今場出番班主力，主場出擊有力一戰，兩軍近期上半場少有入球，半場和可以一博。

（TVB 301周六晚8時30分直播）
錫菲聯主場夠惡有「修」穫

羅奇代爾喺英錦標收起大批主力，包括神射手維辛迪、隊長占美阿倫、後防大將蘭卡舒利、首席門將利尼斯等，佢哋8日內要踢3場波，對呢間兵源唔算雄厚嘅球會嚟講，點都要作出取捨，主力受傷比盃賽出局更大鑊，英錦標輸畀乙組仔亦無可奈何。羅奇代爾近5主場僅一敗，今場對手韋根雖然實力較高，不過佢哋近4仗有3場半場冇波入，今場半場和捧得過。

另一場英甲直播賽事，錫菲聯主場迎戰修安聯，錫菲聯近6主場贏咗5仗夠晒惡，對住近3作客1和2負嘅修安聯，主勝要捧！（TVB 301周六晚11時直播）最後就係奧咸作客車士打菲特，奧咸已經6場作客不敗，非常硬淨，近7主場僅得1勝嘅車士打菲特讓唔起佢哋，捧讓球客勝。

（周六晚11時開賽）