馮諾嘉手記：1800夠經驗 信龍的傳說

纯情小彩迷

　　排位表一出，睇番噚日品題嘅兩匹心水馬「時時攞彩」同「超群如意」嘅排檔，際遇真係截然不同，前駒抽得四檔相當好跑，難得形勢配合，係時候贏馬開齋。至於「超群如意」，論級數比起同場好多馬都高得多，雖然周日係跑A+3欄，近日亦冇落雨，場地偏差相信並唔明顯，但係今次抽十三檔，無疑係好蝕底，再睇同場對手，仲有一匹可以威脅佢嘅強手「蓬萊仙子」。

　　「蓬萊仙子」不但負磅比「超群如意」輕，而且抽到不俗嘅四檔，呢匹馬今季已經喺同程奪得兩贏兩位，上場排十二檔起步，全程走二叠，反觀奪冠嗰匹「普梳王」就抽得一檔，大部分途程都係貼欄慳位競跑，入直路先至移出望空，兩匹馬鬥衝之下，「普梳王」壓倒「蓬萊仙子」贏馬，今場「蓬萊仙子」嘅形勢完全改觀，喺形勢造就之下，大有機會跑贏「超群如意」，補番上次條數。

　　周日亦有場盃賽，第七場三班草地1800米，爭十八區盃，呢場大家嘅注意力一定係集中喺「我愛您」身上，佢上場初出跑四班1600米，表現已令人眼前一亮，直路上追勢凌厲，只係以頸位僅敗，差啲就畀佢爆出56倍大冷W，雖然今場有一定勝算，但係咁快就上三班挑戰，兼且增程跑1800米，亦有多少疑點，馬膽都係搵「龍的傳說」穩陣。

　　「龍的傳說」雖然喺香港仲未開齋，但1800米已經跑過三場，仲喺同程兩度入位，路程有根有據，前仗跑好至黏地，超慢步速不利後上，僅敗可以理解，今場只要發揮出應有水準，可望開齋贏馬。

東廐食尾胡

　　尾場二班草地1400米，睇好「豐綵」，呢匹馬今季跑咗三場，上場跑黏地，抽得二檔好位，一放到底，輕勝亞軍成兩個半馬位，雖然上賽有場地之 助，但睇走勢亦唔簡單，呢匹東廐馬已開竅，有機會食尾胡。