洪禮賢講馬：明燈增程出頭

纯情小彩迷

　　柏寶、白德民及馬偉昌是次賽事各有唔錯兵力，最堅好似係阿寶，但後兩者唔見得沒有能力衝擊騎師王，尤其阿民。至於練馬師方面，仍舊係前列幾個馬房最有影響力，方、蔡都惡馬連場。

重心場次

第10場  第三班（80-60分）1400米

　　草地蓬萊仙子季內準繩與進步並蓄，尤其上場改了跑法，又面對升班的阻力，最終也可入Ｑ，反映目前分數未遇到太大阻力。今場排四檔起步，加上預期步速唔快，估計會繼續賺形勢，而場地快慢也不拘，縱熱也不宜拗頸。

    　「超群如意」情況與前駒相同，唯一唔同係佢要負重磅，同埋排檔差，發揮上或有影響。

   　 「沙貝利」從來也覺得在目前分數唔會冇得贏，只係未遇到最啱最夾的騎師，今場用到柏寶，隻馬留後最好又受騎，或許會擦出火花。

    　「綠野飛馳」105磅太着數，而兩仗前同程，跟得前仍有殿軍，撞啱今場慢步速，可望偷襲（而騎練季內4次合作獲冠亞季各一）。「超力駒」加頭罩或是殺着，因陣上易受影響，乜都聽唔到，可能幫到手，而回到此程及排外檔也是變身因素。「特綵」和「獲利多」限於拖腳。

第1場  新馬 1000米 草地

　　獵豹小子試閘好追勢，問題係一再見佢閘前反應普通，所以唔係冇風險存在。

    「軒轅勇將」速度幾好，馬少場合，彼此進度有異，擺在前走點都着數。「超晒班」與前駒一同試閘，論姿態略遜，但選擇不多，拖埋。「福建王者」進度與前駒相近，位望。

第2場  第五班（40-10分）1600米 草地

　　天之驕子一連兩場發揮唔覺好，冇錯，排檔唔好係主因，但騎者並冇全力去救，兩場取位都係蝕到阿媽唔認得（上場仲自己攞嚟塞車），今場降班即用柏寶，按之前在四班輸近的賽績，在此惡到痺，如不是重磅負荷唔起，贏得。

   　 「利之寶」班次着數，而本身係不用看近績的馬，有埋一檔教埋偉仔點跑，形勢正晒。「大隊長」預期轉配件會幫到幾多，而佢又係另一匹五班惡爺，跑番此程也會比長途好。再揀落去，不離「鴻福星威」及「智勇非凡」，前駒配備變動係誘因﹔後駒在此場冇馬放場合，或賺晒形勢。

第3場  第四班（60-40分）1200米 草地

　　驍騎無敵連續兩場冇W有Q，一旦進度重新起莊，在四班根本夠班有餘，排內檔也有很大幫助。「麗晶之星」贏開，望落此批對手，整體似乎還比上場失色，再追。

    　「競駿大師」唔叻，勝在一檔守好位，或賺到腳程。「好歌」十四檔未必可蝕得起，如早段cut到埋嚟則作別論。「大關刀」贏完一招了﹖唯少馬帶場合，可能變到身。

第4場  第四班（60-40分）1200米 泥地

　　實業輝煌五季以來首次落到四班，形勢有賺，但礙於重磅，未必如想像般具壓倒性能力。「四季大同」一時好一時冇，勝在對上兩場喼到，加上回到此程最啱。

    　「風陵渡」在此班跑泥地好惡，外檔也唔會驚。「甜酒」一檔而速度快，放得順可能有三甲。「時時攞彩」未完全收斂口勁，如內檔有對手頂住，佢在二、三叠或會唔識應付。「奄尖大少」唔知點解近仗差得咁緊要，但返泥地可能唔同晒。

第5場  第四班（60-40分）1400米 草地

　　私家路上場在不利追的環境下也入P，甚有指標性，跑落似乎漸見上力，好開唔轉程唔換人，信得過。「高智慧」少馬在前走，相信要克服十四檔唔難。

    　「魅力心」一連兩場在此程，走勢也有唔同程度的吸引，試好晒未唔知，也不知唔轉配件會否早段繼續咁慢，恐怕走雞，拖住先。「鉅業光輝」加頭罩如改到急躁情緒，或會交出前所未見威力。「信賴」有狀態支持，長期在此班有得揮。

第6場  第四班（60-40分）1650米 泥地

　　爆發力經過一場草地賽回一回氣，重返強項點會唔搏，仲要排埋一檔，的確係交代嘅黃金機會。「天寶之威」上場突然跑谷草，今場初次跑泥地，不斷作新嘗試，用意係好。

   　 「金球」今季稍有穩定性，回到泥地可博。「勁擊」未跑過泥地，得唔得成疑。「健康藍莓」或可食到冇馬走的有利形勢。

第7場  第三班（80-60分）1800米 草地

　　納帕二號上場在2000米衝落唔多，就算冇阻過，也不覺得贏到，縮短二百米會好，向來準開，膽材。「紅跑車」配件有唔同或有助（之前兩季初次加配備冇Ｗ有Ｐ），加上用柏寶及轉程，有晒變身下台階。

  　  「我愛您」剛仗入Ｑ的水準是否咁好，真係唔敢講，但難度就真係唔細。「龍的傳說」長途啱，卻冇穩定性可言。「印度光輝」換人會跑高好多。

第8場  本地一級賽 1200米 草地

　　蓮華生輝及「鳥語花香」，一對馬級數高晒，路程性能有幾勁也不用講，單Q互片之局。

    　「同一世界」實力稍失色，陣上卻好有保證。「綠色駿威」和「極奇妙」爭三三四四。

第9場  第三班（80-60分）1200米 草地

　　明燈上場得季軍看似失望，但路程唔係最啱，同埋，該役跑線不利，並唔能夠代表實力見晒，是次轉程夾，威力必更強。「幸運愛駒」一檔啱放，轉回大場唔去谷草等檔位抽獎，夠決心。

   　 「駕寶」季內兩Ｗ，論卡士不比任何對手曳，只是耐冇出要博跑得番幾多成。「劍鋒」如放得出，或可爭Ｐ。「常山鳳寶」爆完缸復出，點都有陰影。「進取」近仗有藉口原諒，如交出水準，可予威脅。「贏馬組合」上手用盡。　

第11場  第二班（100-80分）1400米 草地

　　豐綵上場一放到底，對手完全食塵，今場唔多馬走，形勢一如上賽，重磅就算有阻力，仍具入圍本錢。「好友福」回到1400米，能力勁得多。

 　   「按得快」縮短二百米可能仲啱目前性能。「帝豪名駒」一場接一場進步，確認競爭力升級。「綠色駿駒」三出冇Ｗ有Ｐ，冇理由唔拖。「正毅」復出第二回，未必夠銳在此場逞強。