借題發揮：跑馬地百萬挑戰盃最後一夜 龍武軍「兩手準備」

纯情小彩迷

　　記得上屆跑馬地百萬挑戰盃鬥得天昏地暗，真係未到最後都唔知邊個係winner，最終由「海之宏」後上過晒。來到今屆唔見得形勢明朗化，可以話戲味更濃，既冇話好似上季咁有馬帶到甩晒，等啲對手追，分數亦拉得幾緊，仲要到咗最終回，居然仍有多駒有機會問鼎寶座，今屆的確鬥得幾燦爛。吖！講到呢度，忽發奇想，其實呢項盃賽，來來去去參與嘅都係騎練或馬主，局外人只得個睇字，而目前連騎師王都有得賭嘞，衍生類似產品在百萬挑戰盃之上，唔知可唔可行！？起碼賭仔們有得傾、有得買，過吓癮。

　　好嘞，望番目前百萬挑戰盃嘅前十名，一共十一匹馬，呢次冇份跑得兩件，「極品絲綢」和「輕越直前」，其餘九位健兒則分布在第五至八場，其實排在頭同尾即一對葉廐馬「龍武軍」及「八運寶」，相差廿三分之多，後駒今晚贏埋最多第三（仲要其他可爭嘅馬冇分噃），而前駒以53分head住，無風無浪當然袋得65 萬，但如果佢贏唔到，或冇分攞到，就要睇餘下嘅贏唔贏到嘞，事關喺佢後面有4駒在數字上有得反先，但一定要贏至得，因目前第二位嘅「士多啤梨」得46 分，入Q加埋只得52 分，一樣過唔到頭。

尾場② ④ ⑤鐵角

　　感覺上，「龍武軍」幾老定，佢喺尾場有「兩手準備」，本身一直都咁準，季內跑6 場3W2P，就算今次自己真係贏唔到，仲有隻馬騮幫手嘛，始終「美猴王」唔係易應付嘅對手，上場唔係咁發揮，路短都贏埋，難怪文家良賽後黑起塊面（圖左），跑番1200米，換埋柏寶，目標好堅定（佢亦有權爭上榜）。再數落去，同場係「紅封包」會有威脅啫，所以，② ④ ⑤買Q應該穩陣。

亨利