馬主論戰

纯情小彩迷

勝利福星再贏

  　　剛啱柏寶一日贏四場，既然搏殺手風咁順，今次一於繼續吼實佢手馬捧場。最啱心水係第三場「勝利福星」，上仗跑谷草2200米，拉士一衝即刻彈甩對手贏馬，實力非一般四班馬可比，今次縮程跑1800米一樣合發揮，可以再贏一場。

　　  另一匹心水係頭場「我跑得」，以往七戰谷草一哩獲兩冠三亞兩季，未甩過三甲足見路有專長，今次排響十二檔起步，對於呢匹跑法主動嘅馬影響唔算大，繼續用蘇狄雄減磅上陣，隨時一放到底。

梁廷鏘

勝利福星吼實風之子

  　　告東尼今季表現出色，暫時仲以38場頭馬排響練馬師榜首位，今晚佢手馬惡氣十足，應該會有頭馬落袋。最鍾意第四場「風之子」，近兩仗跑谷草1000米獲一冠一季，證明四歲自購馬已完全適應水土，今次繼續由贏馬拍檔勞愛德操刀，贏多場冇難度。

　　  另外推介第二場「加州首長」，先後跑過一場田草及谷草1000米，相信已經熱夠身，今次增程跑谷草1200米，突然搵嚟柏寶操刀，唔似陪跑咁簡單，臨場有分頭值得一博。

任達華

美猴王見真章

　　  今晚係CSL百萬挑戰盃終極戰，我哋公司同CSL係多年合作夥伴，所以亦獲邀出席佢哋舉行嘅晚宴盛會，先響度預祝賽事舉行成功。其中CSL高層Wesley鄭，多年嚟都好幫得手，同我哋合作得相當愉快，響度都要向佢多謝一聲。

　　  講番賽事，鍾意第七場「精彩生輝」，上仗僅以短頭位輸畀對手，今次增程跑一哩應該會更合發揮，可以補中。另外推介尾場「美猴王」，上次跑1000米嫌短多少，今次跑番強項1200米應該會見真章。

張敬山