賠率有路捉：紫荊票勁郁手

纯情小彩迷

    　今晚胡森六駒全部配主帥衛韜禮，當中「紫荊」、「廣友名駒」及「馬之王」早飛WP都畀人買到大熱，後兩駒連仗入位，有人追捧絕不意外，但前駒季內五戰全負都備受熱捧，W得42蚊，P仲係12蚊，一定要睇實。

　    「紫荊」雖然近兩仗同程谷草一哩排一檔都落敗而回，但要知道呢匹老馬一向慢熱，所以呢兩場跑得差唔可以作準。今戰乃季內第六次出賽，狀態肯定到位，賽前加多個大閘打磨，評分又減到20分，差唔多去番上季首捷時19分水平，既然上季可以喺梁明偉胯下兩捷，過往更喺五班累積六W之多，只要一聲令下，頭馬可謂手到拿來，配合埋早飛WP有強勁支持，小心今晚郁手呀。

　    另外，第二場「七星仔」連仗冇飛，上仗同程四班1200米仲係27倍冷門，但噚日早飛居然只得九倍，明顯有墊底飛。咪以為44分就一定減分落五班，啱啱華廐就有「快都」施冷箭，「七星仔」千祈咪睇小。

柏寶成手惡馬

　    騎師王方面，上期冇咗韋達，柏寶立即榮登騎師王，證明前者缺陣，實力坐騎即歸邊畀後者。今晚柏寶又卜滿八場，「穩操勝算」、「勝利福星」、「特寶樂」、「開心歡樂」同「美猴王」都係惡馬，似乎熱都要捧佢場。

周仲