馮諾嘉手記：心喜悅係時候反彈

纯情小彩迷

　　頭場五班1800米，小妹用咗「心喜悅」做膽，呢匹馬由52分一路減到落到嚟依家嘅30分新低，照計點都有多少反彈空間；上場響同程跑第二，雖然被頭馬「福龍」彈甩成四個幾馬位，但走勢的確比之前有進展，今場負輕磅上陣有望開齋贏馬。

　　配腳方面，「嘉寶神駒」今季跑三場全部有獎金，演出似乎漸趨穩定，韋達唔放手應該有見地。「壽比南山」首次落五班角逐，對手弱有望取得突破。「年年如意」上場拉士衝得好勁，今次排大外檔起步都唔能夠睇小。四連環揀多一匹「飛躍星河」，上場谷草2200米跑第三，今場都有機會跑近。

　　第二場四班1000米，有四匹馬初出，另外有好幾駒亦只係跑過一、兩場，可以話係半新馬賽。初出馬之中，小妹最留意「清新空氣」，雖然小妹對血統唔算太熟，但睇番同父馬好似「旺國手」、「駕寶」等，初出表現都唔曳，照計佢都有一定嘅留意價值。

　　最重要係「清新空氣」在港試過三課閘都有好表現，上月尾試800米閘以第一名過終點，已顯示出上乘速度。本月初試1000米閘，末段捉實亦得第三，走勢更進一步。早幾日再由鄭雨滇試多課800米閘，結果由頭放到尾，仲彈甩第二名嘅「好旺寶」成六個馬位，睇嚟練者都唔怕走勢露光，一於捧場。

　　對手方面，「太極至尊」跑過兩場非冠即位，當然要吼實。「可圈可点」落到四班跑點都有多少着數，韋達肯騎要秤高多少。「聖迪達」今場回師贏馬路程要拖。「好快活」已連番試準，冷勿忘。