洪禮賢 講馬：劍鋒唔放渣都冇

纯情小彩迷

　　正如節目拍檔常常掛在口唇邊，有時賽馬活動唔係單單只涉及金錢成分，勝負不會是全部，贏了未必代表買咗嘅馬跑啱晒（對手跑錯晒咪得米），輸了又唔會一定要騎師負上全責（唔夠人鬥亦冇說法好講），所以陣上演繹得好唔好才是重要。

　　撇開一些難騎嘅馬，或未有任何表現嘅馬，單講已確立了賽績的馬匹，好像周三夜賽第三場「劍鋒」，冇錯，賽後報告已解釋得好清楚，策騎指示係可以放，又可以佔取包廂位置，但既然之前幾場唔放就「窩」晒，而此駒當時喺入彎已攞到欄，基本上，之後順勢帶頭，「太陽昇」就會企喺度，不特止冇欄要二叠望空，亦輪唔到佢拖慢嚟放，咁就唔會發生「劍鋒」之後唔肯保持位置，及「無啦啦」被拋離的情況。

騎者崇尚順其自然

　　筆者爬格子，在此可能紙上談兵吧，陣上或是兩回事，同埋一如騎者賽後所指，如果早段要頂住內欄，可能要消耗坐騎較多氣力。但有兩點大家也要留意，其一，「劍鋒」好開嗰排全部係靠放食胡，真真正正確立了賽績﹔其二，蔡明紹經常在陣上崇尚順其自然地跑，季內就算演繹到過火而被抽秤嘅例子都唔少，何解今場會被韋達的「太陽昇」智破了。還是那句，唔係懷疑騎者陣上的鬥志，打個譬如，明明好主動嘅人，朝早見到你，唔只打招呼，仲送埋早餐過你手，突然某一日，見到你唔出聲都算嘞，仲走埋嚟整巴你嘆吓，摑完左邊摑埋右邊，一定更加火起吧﹗﹖