國米守「細」波求止瀉

猪拉多纳

連吞兩場3蛋信心受挫

意甲周中開快車，國際米蘭連續2場慘敗後信心低落，今晚主場對基爾禾肯定以穩陣為先，而且「藍黑兵團」今季踢法偏向保守，11仗主場聯賽8度開「入球細」，今場似乎都係開細居多。

國米上場喺「米蘭打吡」慘吞3蛋，連埋之前喺意大利盃吞祖雲達斯3蛋，近2場大戰輸咗6球，今場就算對住實力低一班嘅基爾禾都唔敢冒險，新加盟前鋒艾達馬田斯適應需時，莫路伊卡迪上場射失12碼狀態麻麻，入波點會多呀？
近5聯賽對基爾禾4次細

最重要領隊文仙尼作風保守，經常派出干度比亞、加利美度及菲臘比美路等防中上陣，呢種以穩為先嘅戰術思維，確令該隊失球數字大減，但火力亦同時受削，今季11仗主場聯賽，竟有8仗開出入球細。

除此之外，國米近5次聯賽對基爾禾，亦開出4細1大，基爾禾喺冬季轉會窗將首席射手柏路斯治賣走，另一前鋒柏比亦有傷，作客擺到明會泊大巴博1分，入球細穩陣。