獅吼震散噴射機

猪拉多纳

澳職猴年第一場波今日上演，爭標熱門布里斯班獅吼主場迎戰紐卡素噴射機。主隊近期回復霸氣，2位年輕箭頭占美麥卡倫同班頓波里路狀態巔峰，今仗對住出晒名嘅「作客蟲」紐卡素噴射機，呢封3分「大利是」絕對可以袋袋平安，捧1.72倍讓球主勝！

（有線64、203周五下午5:00直播）
澳洲U23黃金組合發功

澳洲國家隊就快為下月世盃外圍賽點兵，各界齊齊力撐占美麥卡倫首度入國家隊，事實上呢位獅吼前鋒狀態十足，目前澳職射手榜排前5名，就只有占美麥卡倫一個「土炮」，依家佢梗係搏命入波證明身價啦！佢嘅拍檔班頓波里路前日宣布同獅吼續約2年，呢對澳洲U23黃金組合信心爆晒棚。

講開澳洲U23，其實布里斯班獅吼今季霸氣十足，如果唔係1月中U23亞洲盃抽走占美麥卡倫同班頓波里路等主力，搞到獅吼喺3場聯賽只得1分，依家獅吼應該坐緊「一哥」位啦！占美麥卡倫回歸後獅吼已經連贏2場，呢位22歲箭頭亦有3個入波進帳，今場點會畀佢停呀？
噴射機作客4連敗

紐卡素噴射機上場聯賽爆冷贏墨爾本城，不過對手有差唔多3分1嘅時間係踢少1個，噴射機最後贏波都贏得相當驚險。眾所周知噴射機客戰成績唔掂，近4場作客聯賽全部輸晒、連續5次客場聯賽冇入波，咁嘅表現挑戰獅吼，簡直係以卵擊石啦。