馬主論戰

纯情小彩迷

鴻霸之星放到

　　今日我哋隻「鴻霸之星」（圖）有份上陣，呢隻馬雖然已經九歲，但其實都仲有兩腳，季內跑得最好嗰場正係響田草1200米得第三，今次跑番呢項路程，排二檔兼負106磅相當好跑，希望可以順利放到終點喇﹗

　　另一匹心水係第五場「光芒四射」，上場響田草1600米開齋，贏馬姿態相當輕鬆，反映四歲馬已正式踏入升軌。今次呢隻馬繼續跑贏馬路程，負磅唔算重，同場對手實力亦唔見得好強，文家良今季搏殺如有神助，不妨吼實此駒。

梁廷鏘

鴻霸之星鳥語花香捧盃

　　女皇銀禧盃只得八隻馬跑，仲要係平磅上陣，賽果應該會比較正路，睇好摩廐「鳥語花香」可以捧盃。上場小休復出狀態未夠，響主席短途獎輸畀「蓮華生輝」跑第三，表現其實唔曳，熱身後今次增程跑1400米，計卡士全組數一數二，應該可以補中。

　　另外鍾意頭場「精密紡」，跑咗三仗表現平平，但今次轉攻田草1200米，卻突然綁脷兼搵埋柏寶操刀，睇部署唔似陪跑咁簡單，同父馬「好心星」贏過此程，今次增程而臨唔可以睇小。

張敬山

鍾意極品絲綢

　　全日賽事嘅焦點係第八場打吡大賽，我睇好方廐「極品絲綢」可以勇奪殊榮，上場跑打吡預賽只係早咗出頭，終點前先至畀「至勇威龍」追過。有過上仗經驗之後，韋達應該會有更佳發揮，即管睇吓能否順利贏馬而回喇﹗

　　另一場重頭戲第七場女皇銀禧盃，「再領風騷」以往響1400米累積六場頭馬，計往績係全場之冠，而季內亦響同程贏過「友誼至上」、「新力勁」，級數唔使懷疑，今次平磅作賽有着數，有權響高雅志胯下放到。

任達華