馮諾嘉手記：開心動力匆出有計

纯情小彩迷

　　剛啱打吡賽日，原本焦點之一係睇吓蔡廐「勇敢小子」能否打破七捷魔咒，結果呢隻馬只係跑第三；反而蔡約翰嘅好拍檔韋達就做咗主角，打破在港跑打吡例唔贏嘅宿命，憑「極品絲綢」吐氣揚眉。

　　睇番韋達今次嘅發揮真係好出色，唔再見到以往心急發力嘅鏡頭，等到直路先將「極品絲綢」嘅後勁發揮到淋漓盡致，結果終點前一步擒下突然神勇嘅「威利旺旺」，難怪賽後韋達都笑到見牙唔見眼。

　　至於蔡約翰雖然搏失咗「勇敢小子」，但都憑「明燈」、「安御」同「沙貝利」中三元，依家同方嘉柏一樣累積40場頭馬，而榜首嘅告東尼則有41W，似乎今屆冠軍練馬師之爭將會愈嚟愈刺激。

　　明晚第五場三班1650米，小妹用「易搏贏」做膽，前仗無端端放頭跑，上場又走去試泥地，敗績唔使太介懷，今場回師曾入Q嘅谷草一哩應該可以出頭。配腳方面，「緣是燦爛」評分已經減到有利水平，隨時郁手。「驃驥王」今季仲未交代，改配馬偉昌或有不同發揮。「超勁精神」後勁強，追入一席唔奇。「勁有利」用蘇狄雄減磅好跑，拖一票無妨。

　　第六場三班1200米，最鍾意方廐「開心動力」，上場初上三班作賽，結果響同程一放到尾，姿態相當輕鬆，今次隔一星期匆匆再出，只要體力頂得住應可連捷。對手方面，「超勝」季內四度獲亞，演出夠準要拖。「駿蹄飛」初跑谷草或者會有所突破。「大旋風」季內三戰同程非勝即位，唔能夠睇小。「輕輕鬆鬆」有備而來，可以兼顧。