馬德里打吡大畀你睇

猪拉多纳

今晚西甲早場上演馬德里打吡戰，皇家馬德里主場對馬德里體育會。由於榜首巴塞隆拿喺積分榜已大幅拋離首都雙雄，今仗可以剝定花生等睇戲，最理想當然係睇到兩支死敵和波攬炒。因此皇馬同馬體會如果唔想提早「收工」，無論如何都會豁出去鬥攻博一博，希望踩住對手上，保持些微爭標機會，加上皇馬入球能力驚人，捧大好合理。

（now 632周六晚11時直播）
銀河艦隊火力威猛

今季西甲爭霸形勢，巴塞隆拿直情超班到去咗另一個星球咁，目前分別拋離皇馬同馬體會9分同8分，因此今周兩軍對撼，輸波一方固然難以翻身，打和亦係「兩敗俱傷」，所以兩隊都冇得揀，一定要爭勝搶晒3分，保持些微嘅爭標希望，特別係皇馬有主場優勢，必會更加進取。事實上「銀河艦隊」自從由施丹執教後，主場出擊例必喪攻對手，佢領軍後4場主場全勝並攻入20球，換言之平均每場入5球，非常誇張。

賽前皇馬更收好消息，前鋒賓施馬已經傷愈可以候命，呢位法國國腳早前曾連續6場西甲入波，可見佢喺施丹指揮下表現特別醒神。另「銀河艦隊」周中冇歐聯踢，C朗等球星叉足電，火力更猛。不過，皇馬防守麻麻，近6場聯賽5場有失波，遇上實力分子嘅馬體會，或難保清白之身。
馬體會數據唔輸蝕

馬體會周中歐聯作客同燕豪芬打和0比0，連續兩仗食白果。不過打吡戰面子悠關點都冇得縮。事實上，馬體會近4次作客皇馬取得1勝2和1負，數據並唔輸蝕，因此唔怕同對手駁火。值得一提，車路士幾乎肯定會聘請干地執教，意味之前上「車」大熱嘅馬體會教練施蒙尼好大機會留任，減少不明朗因素，將帥們可以專心搏殺，預料將有不俗發揮。另射手費蘭度托利斯已回勇，近3仗聯賽射入兩球，馬體會贏唔贏到仲未知，但起碼應該有波入，因此大盤係正路之選。