高清睇跑馬：開心動力有排贏

纯情小彩迷

　　今季總場次448谷草三班1200米，「開心動力」排七檔，出閘後勞愛德雖未有積極推騎，但馬匹望空後即主動搶走，可惜內檔馬速度不俗，首次轉彎時走三叠蝕位，一直到六百米才能切入內欄。由於早段蝕位兼用了不少體力，但入直路後走勢仍然強勁，故此去到最後二百五十米德叔先作推騎，最終愈放愈勁輕鬆取勝。「開心動力」首次出戰三班賽即有突出表現，可見馬匹進步良多，搵啱跑法後有力扶搖直上。

　　另外，總場次431谷草三班一哩，「精算攻略」排五檔，預計不用留得太後，但起步即遇意外，「生生不息」、「真係寶」一隻內閃一隻外閃，「精算攻略」食正三文治要勒避。幸好頭兩段步速快，過了七百米後前領馬速度開始減弱，原居尾列的「精算攻略」亦走出三叠望空，過了六百米後勞愛德順勢推騎發力，並於轉彎時走四叠，蝕位雖不少，慶幸入直路後衝刺強勁，不過內檔的「旅遊小子」鬥心甚強，兼且「精算攻略」一度內閃，鞍上人打右手鞭時閃得更勁，結果僅輸頸位予「旅遊小子」跑第二。細看直路走勢，原來「精算攻略」一直只出右腳衝刺，可見評分肯定仍有上升空間，回配韋達穩補中。

Sam