墨爾本城專食大茶飯

猪拉多纳

今日澳職有兩場直播波，阿King重心推介係墨爾本城主場對FC悉尼。墨爾本城主場表現向來唔錯，而且踢得好進取，近5次主場出擊總入球都超過3球，今仗面對剛喺亞冠盃主場贏咗中超班霸FC廣州（廣州恆大淘寶）嘅FC悉尼，有望上演入球騷，入球大細中位數雖然調升至3/3.5球，阿King照捧大盤。

（有線64及203台周六下午4時30分直播）

墨爾本城畀人感覺係攻強守弱，球隊入球數冠絕整個澳職，但失球僅比榜尾嘅中岸水手少而同尾二嘅威靈頓鳳凰睇齊，可見呢班波防線表現麻麻，能夠排喺第4同佢哋火力強勁有好大關連。墨爾本城今仗雖有射手哥利加美路續抖，但前鋒哈利洛維強勢回歸，加上最近5次主場比賽，總入球都超過3球，反映球隊入得又失得，今仗大有機會再出現呢一幕。

FC悉尼周中喺亞冠盃分組賽擊敗中超冠軍球隊FC廣州，成功終止連續7場贏唔到嘅頹勢。不過，FC悉尼作客表現其實麻麻，近4仗客戰未贏過，今仗造訪墨爾本城，雖有中場艾希爾復出，但後衞懷奧、積基斯法迪、中場賴恩格蘭同前鋒戴夫卡尼都要停賽，實力受損下難望抵擋墨爾本城攻勢，入球大係阿King最佳心水。
格拉斯哥發圍捧上盤

另一場澳職由威靈頓鳳凰主場對阿德萊德聯，鳳凰雖有射手哈美殊屈臣復出，但阿德萊德聯亦有翼鋒奇治葛雲復操，加上作客已經連贏4場，今仗有力反客為主，讓球盤阿德萊德聯小讓平半捧上盤。

（有線64及203台周六下午2時15分直播）

而蘇足盃8強戰由蘇冠嘅格拉斯哥流浪主場對蘇超嘅登地，登地有後衞麥柏基、戴倫奧迪亞同干拉特唔踢得，隨時想畀喺盃賽有一番作圍嘅格拉斯哥流浪有機可乘，讓球盤格拉斯哥流浪讓一球一於捧上盤。

（周六晚上8時30分開賽）