洪禮賢講馬：等到金巴利來加程

纯情小彩迷

　　對於騎師陣上演繹，有時真的哭笑不得，像啱啱周中快活谷夜賽，巫斯義就係最佳例子，嘩，贏「揀得正」的一役，簡直係出神入化，全程好老定殿後，轉直路彎施施然兜出大外叠，還要繞過「吉利大哥」，只見阿巫「霹靂啪嘞」狂抽幾鞭，馬兒幾個箭步在最外檔便冚過晒，臨近終點前，騎者仲有時間玩吓鞭花，同埋展露勝利的微笑，的而且確，呢一場勝仗，完全體現到咩叫做大師級騎技。

巫斯義錯完又錯

　　但鏡頭一轉，去到當晚第五場，佢處理「重量級」的手法卻令人呆晒，冇錯，隻馬加番眼罩，可能起到刺激作用，但既然出閘後已搶到欄帶出，而外側又冇對手拍上嚟（「寶成智星」亦已埋欄跟隨），基本上要快要慢，全由佢話事，更重要係，未到對面直路前，阿巫曾經扣實隻馬，唔想坐騎放咁快，但點解轉完首彎唔繼續咁樣處理，而未入直路彎之前，佢仲畀多兩錢肉緊去催騎。大佬﹗你估「重量級」係超九班嗎﹖隻馬大部分途程放得快，又冇回氣位，還要早發力，去到最後百幾米先至腳軟已經好叻﹗其實早在1/11，巫斯義騎此駒又係類似咁跑，當時小組認為佢早段騎法，缺乏以其級數騎師應具的判斷力。咦，寫到呢度突然想起，乜呢個世界唔係經一事，長一智嘅咩﹗﹖

　　來到今期賽事，初步喜歡第六場半冷門「金巴利來」，一早已鎖定此駒要跑中程，之前多番停留在短途，或許未到時候，但見陣上曾嘗試唔同跑法，尤以前一場守好位效果最好，所以今場排三檔應會事半功倍﹔上賽名次忽然落後則不用介意，因賽後連練者也覺得跑錯嘛﹗肯換人及加程，點會唔想求突破。