馮諾嘉手記：傑出君子排靚檔

纯情小彩迷

　　日前馬會正式公佈薛廐副練一職人選，係由原本於蔡約翰馬房騎馬人嘅練力游Eric晉升，由於練馬薛達志與前副練鍾占祺鬧翻，馬房又多風波，今次申請副練面試嘅員工並不多，而進入第二輪面試亦只有三人，當中包括現任黃汝安馬房騎馬人余健誠，最終薛達志就揀選咗練力游，升做副練是否值得高興亦言之尚早，一來呢席副練絕對唔易做，交唔到好成績壓力又大，其次是呢位老闆並唔易招呼，工作時間相對其他馬房為長，最重要係假如今次再與練者鬧不和，又淪落當第二副練，只有底薪冇獎金分。

　　咪以為蔡約翰馬房嘅騎馬人收入少，保守估計佢哋嘅人工每月有五萬左右，分分鐘好過一位中下游馬房嘅副練，加上蔡約翰為人友善，少說話多做事，又冇乜脾氣，每季成績又穩定，所以聽講呢席騎馬人空缺，依家已經爭得頭崩額裂，唔少騎馬人都想轉倉，馬會每季都會去到季尾才安排人手調配，暫時由柏寶老婆嘅妹妹班娜迪任呢席騎馬人。

　　第六場四班1400米，用「傑出君子」做膽，一連幾仗跑得好，今場有二檔之利可補中，配腳有上場此程放入第二嘅「松風」、近場愈跑愈近嘅「旅遊大亨」同王牌再戰、負輕磅嘅「私家路」，四連環揀多一匹四戰此程已兩度跑近嘅「越跑越有」。

　　尾場三班1400米，用三戰兩度跑近嘅「千江映月」做膽，配腳有上場後上走勢不俗嘅「川滙主帥」、演出準繩嘅「超群如意」同抽得二檔不俗嘅「特好」，四連環揀多一匹近仗所負不遠嘅「鎗臣」。