松鼠主場有雞偷

猪拉多纳

三箭傷疲冇晒霸氣

日職今日只得兩場賽事，其中「升班馬」大宮松鼠會喺主場迎戰上季聯賽盟主廣島三箭。松鼠開季後表現出色，上仗作客雖然輸畀大阪飛腳，但表現唔算太差，面對開季作客表現麻麻嘅三箭，阿謙睇好松鼠今場有力搶分而回，有得受讓捧讓球主勝。

（有線61及201台周日下午3時直播）

松鼠今季重返日職後，保留大部分升班功臣，球隊默契得以維持，所以開季錄得兩戰全勝。松鼠上周雖然作客不敵飛腳，但球隊表現唔算太差，今仗只有中場黑川淳史因傷缺陣，而且近日更傳出高層希望能夠邀請到，曾帶領日本女足奪得女子世盃冠軍嘅佐佐木則夫加入管理層，明顯有心大搞下球員自然更落力搏殺。
三箭踢完亞冠盃匆匆作客

三箭剛喺上周中亞冠盃分組賽擊敗武里南聯，自2月中日超盃後再嘗到勝利滋味，但球隊喺聯賽始終未開齋，似乎仲未重拾信心。三箭射手佐藤壽人喺上周六嘅賽事度過自己34歲生日，但佢不但入唔到波，仲喺比賽中因腳趾受傷提早退下火線，今仗上陣成疑，加上中場森崎和幸同川崎裕大都唔踢得，今仗作客未必咬得入松鼠，讓球主客和三箭讓一球，阿謙推介讓球主勝。