皇馬點贏西維爾？

猪拉多纳

爭標無望 施丹嗌走

今晚西甲前列大戰，皇家馬德里主場對西維爾，皇馬已落後榜首巴塞隆拿12分，爭標機會名存實亡，今仗又有一對中堅沙治奧拉莫斯同比比停賽，令原本已唔多穩陣嘅防線雪上加霜，加上教練施丹前途未明，亦有損士氣。至於西維爾仲要力爭前4歐聯入場券，戰意勝主隊一籌，捧讓球客勝。

（now 632周一凌晨3時30分直播）
拉莫斯比比齊停賽

皇馬自從上月輸畀馬體會之後，教練施丹都投降，承認已經難以超前巴塞，今季餘下目標將全力爭歐聯錦標。難怪「銀河艦隊」近期西甲顯得戰意鬆散，上仗僅以2比1小勝拉斯彭馬斯，仲有沙治奧拉莫斯被逐，今場要停賽，比比亦儲夠黃牌「坐波監」，加上射手賓施馬有傷在身，上陣成疑，削弱球隊攻力，相信皇馬餘下西甲會更加「錫身」，以免再造成主力受傷，影響歐聯戰線。

此外，有傳施丹考慮季尾辭職，為皇馬增添不明朗因素。呢位法國球王上任後，總算管得掂一眾球星，如果佢唔肯留任，眾星隨時又作反，引發內訌。「銀河艦隊」今季餘下聯賽可謂隱憂重重，小心中伏。
讓球客勝好分頭

西維爾首循環曾以3比2擊敗皇馬，絕對唔失禮，佢哋現時落後第4位維拉利爾5分，由於維拉利爾今輪將硬撼巴塞，好可能失分。因此，西維爾只要全取3分，將可以大大拉近距離，球員爭勝決心必強，受讓「+1」下讓球客勝有成3.3倍，非常值博。